بھارتی کرکٹ بورڈ کا ایشیا کپ میں شرکت نہ کرنے کا فیصلہ

لاہور: پاکستان کے خلاف ایک نئی چال کے طور پر بھارت نے ایشیا کپ سے علیحدگی اختیار کرنے کا عندیہ دے دیا ہے۔

بھارتی کرکٹ بورڈ (بی سی سی آئی) نے مینز ایشیا کپ اور ویمنز ایمرجنگ ایشیا کپ میں شرکت نہ کرنے کا فیصلہ کیا ہے۔

بھارتی میڈیا رپورٹس کے مطابق مینزایشیا کپ رواں سال ستمبر میں شیڈول ہے جبکہ خواتین کا ایمرجنگ ایشیا کپ جون میں سری لنکا میں منعقد ہونا ہے۔

بی سی سی آئی کے ایک اہلکار نے اس فیصلے کی وجہ بیان کرتے ہوئے کہا کہ چونکہ ایشین کرکٹ کونسل (اے سی سی) کے صدر اس وقت چیئرمین پی سی بی، محسن نقوی ہیں، اس لیے بھارت کسی ایسے ٹورنامنٹ کا حصہ نہیں بن سکتا جس کی سربراہی پاکستان کے وزیر کے پاس ہو۔

ذرائع کے مطابق، بھارتی بورڈ نے فی الحال خواتین ایمرجنگ ایشیا کپ سے دستبرداری سے متعلق اے سی سی کو زبانی طور پر آگاہ کیا ہے، جبکہ دیگر شیڈول ایونٹس کو بھی روک دیا گیا ہے۔ بھارتی بورڈ اس حوالے سے اپنی حکومت سے مسلسل مشاورت میں مصروف ہے۔

ادھر اطلاعات یہ بھی ہیں کہ بی سی سی آئی نے اب تک ایشین کرکٹ کونسل کو باضابطہ طور پر دستبرداری کے فیصلے سے آگاہ نہیں کیا، تاہم اس حوالے سے تیاریوں کی خبریں گردش کر رہی ہیں۔

بھارتی میڈیا کا کہنا ہے کہ پاکستان اور بھارت کے درمیان جاری کشیدگی کے پیش نظر بی سی سی آئی نے ایشیا کپ سے کنارہ کشی اختیار کرنے کا فیصلہ کیا ہے۔ یاد رہے کہ اس سال کا ایشیا کپ بھارت میں ہونا ہے، اور بھارت موجودہ دفاعی چیمپئن بھی ہے۔