کراچی: چیمپئنز ٹرافی 2025 کی تیاریوں کا جائزہ لینے کے لیے انٹرنیشنل کرکٹ کونسل (آئی سی سی) کے 6 رکنی وفد نے نیشنل بینک اسٹیڈیم کراچی کا دورہ کیا اور وہاں ہونے والے تعمیراتی کام کا تفصیلی جائزہ لیا۔
نجی ٹی وی کی رپورٹ کے مطابق آئی سی سی کے وفد میں براڈکاسٹرز، ایونٹ مینجمنٹ اور کرکٹ آپریشنز کے اراکین شامل تھے۔
اس موقع پر پاکستان کرکٹ بورڈ (پی سی بی) کے ڈائریکٹر انٹرنیشنل، عثمان واہلہ نے وفد کو نیشنل اسٹیڈیم کراچی کے حوالے سے تفصیلی بریفنگ دی۔
آئی سی سی کے وفد نے اسٹیڈیم میں زیر تعمیر نئی عمارت کا گہرا جائزہ لیا اور ترقیاتی کام کی پیش رفت کو دیکھا۔
یہ بھی پڑھیں: آئی سی سی ٹیسٹ رینکنگ: بابراعظم کی ترقی، سعود شکیل کی تنزلی
ذرائع کے مطابق وفد نے اب تک ہونے والے انتظامات پر اطمینان کا اظہار کیا۔ اس دوران آئی سی سی نے ٹیموں کے ہوٹل کا بھی دورہ کیا اور وہاں کے انتظامات کا بغور معائنہ کیا۔
واضح رہے کہ میگا ایونٹ کا پہلا میچ 19 فروری کو میزبان پاکستان اور نیوزی لینڈ کے درمیان نیشنل بینک اسٹیڈیم کراچی میں کھیلا جائے گا۔
