افراط زر میں نمایاں کمی اور مثبت معاشی اشاریوں کے نتیجے میں جمعرات کو پاکستان اسٹاک ایکسچینج (پی ایس ایکس) میں کاروبار کے آغاز پر زبردست تیزی دیکھی گئی، جس میں کے ایس ای 100 انڈیکس ایک ہزار 604 پوائنٹس کا اضافہ ہوا۔
پی ایس ایکس کی ویب سائٹ کے مطابق صبح 11 بج کر 40 منٹ پر بینچ مارک کے ایس ای 100 انڈیکس 1.50 فیصد اضافے کے ساتھ 1,06,708 پوائنٹس کی سطح پر پہنچ گیا، جو گزشتہ روز 1,05,149 پوائنٹس پر بند ہوا تھا۔
نومبر میں پاکستان کی سالانہ افراط زر کی شرح کم ہو کر 4.9 فیصد پر آ گئی، جو 2017 کے بعد سے کم ترین سطح ہے۔ گزشتہ ہفتے اسٹاک ایکسچینج نے پہلی بار 1 لاکھ پوائنٹس کا سنگ میل عبور کیا تھا، جس سے سرمایہ کاروں کے اعتماد میں اضافہ ہوا۔
پاکستان کا تجارتی خسارہ سال بہ سال 19 فیصد کمی کے ساتھ 1.59 ارب ڈالر پر آ گیا ہے، جس سے کرنٹ اکاؤنٹ سرپلس کی امیدوں کو مزید تقویت ملی۔
بدھ کے روز بھی پی ایس ایکس میں تیزی برقرار رہی۔ تجزیہ کاروں نے بتایا کہ سرمایہ کار 16 دسمبر کو ہونے والے مانیٹری پالیسی اجلاس میں شرح سود میں کمی کی توقعات سے پرامید ہیں۔
معاشی بحالی کے آثار، سیمنٹ اور پیٹرولیم مصنوعات کی فروخت میں اضافہ اور دیگر مثبت رجحانات کو بھی اسٹاک مارکیٹ کی تیزی کے عوامل قرار دیا جا رہا ہے۔
ٹاپ لائن سیکیورٹیز لمیٹڈ کے مطابق، ہفتے کے آغاز میں تیار مارکیٹ میں تجارتی قدر 57 ارب روپے (203 ملین ڈالر) تک پہنچ گئی، جو 18 سال کی بلند ترین سطح ہے۔
