لاہور:پنجاب حکومت نے ماحولیاتی آلودگی کے خاتمے اور اینٹی اسموگ پلان کے تحت صوبے بھر میں تمام سرکاری و نجی گاڑیوں کے لیے فٹنس سرٹیفکیٹ کا حصول لازمی قرار دے دیا ہے۔ اس حوالے سے حکومت نے باقاعدہ نوٹیفکیشن جاری کر دیا ہے۔
وزیراعلیٰ پنجاب مریم نواز کی ہدایت پر تمام سرکاری اور نجی گاڑیوں کی جانچ پڑتال کا فیصلہ کیا گیا ہے۔ نوٹیفکیشن کے مطابق ہر قسم کی گاڑی، چاہے چھوٹی ہو یا بڑی، فٹنس سرٹیفکیٹ اتھارٹی سے معائنہ کروا کر تصدیق نامہ حاصل کرنے کی پابند ہوگی۔
حکومت نے تمام گاڑیوں کے معائنے کے لیے 30 جنوری کی ڈیڈ لائن مقرر کی ہے۔ نوٹیفکیشن میں تمام وزارتوں، ان کے ذیلی محکموں، اور ان کے زیرِ استعمال گاڑیوں کو ہدایت کی گئی ہے کہ مقررہ تاریخ تک فٹنس سرٹیفکیٹ حاصل کر لیا جائے۔
یہ اقدام اینٹی اسموگ پلان کے تحت کیا جا رہا ہے، جس کا مقصد فضائی آلودگی کو کم کرنا اور ٹرانسپورٹ کے معیار کو بہتر بنانا ہے۔
