بلوچستان کے ضلع دکی میں ژالہ باری نے 42 سال کا ریکارڈ توڑ دیا، جس کے باعث علاقے میں سردی کی شدت مزید بڑھ گئی ہے۔
دکی کے مختلف علاقوں میں ہونے والی اس ژالہ باری سے سولر پلیٹس اور درختوں کو شدید نقصان پہنچا، جبکہ رہائشیوں کو بھی مشکلات کا سامنا ہے۔
دوسری طرف وادی نیلم کے معروف سیاحتی مقامات اڑنگ کیل اور اپر گریس نے برفباری کے بعد سفید چادر اوڑھ لی، جو سیاحوں کے لیے ایک خوبصورت منظر پیش کر رہے ہیں۔
سندھ کے مختلف شہروں میں صبح اور رات کے اوقات میں سردی کی لہر برقرار ہے، جبکہ کراچی میں آج سے وقفے وقفے سے تیز ہوائیں چلنے کا امکان ظاہر کیا گیا ہے۔
محکمہ موسمیات کے مطابق پیر کے روز پاکستان میں سب سے کم درجہ حرارت لہیہ میں منفی 8 ڈگری سینٹی گریڈ ریکارڈ کیا گیا، جبکہ سکردو، گوپس، ہنزہ میں منفی 3 اور کالام میں منفی ایک ڈگری سینٹی گریڈ رہا۔
