حیدر علی نے پیرس پیرالمپکس میں ڈسکس تھرو میں برونز میڈل جیت لیا
پیرس: پاکستان کے نامور پیرا ایتھلیٹ حیدر علی نے پیرس میں جاری پیرالمپکس 2024 میں ڈسکس تھرو کے ایف 37 کیٹیگری میں ایک اور تاریخی کامیابی حاصل کرتے ہوئے برونز میڈل اپنے نام کر لیا ہے۔
حیدر علی نے شاندار آغاز کرتے ہوئے پہلے راؤنڈ میں 52.28 میٹر کی تھرو کرکے مدمقابل کھلاڑیوں کو پیچھے چھوڑ دیا تھا۔ تاہم دوسرے راؤنڈ میں ان کی تھرو فاؤل ہو گئی۔ اس کے بعد مسلسل تین تھرو بھی فاؤل ہونے کی وجہ سے ان کی پوزیشن میں کمی آئی اور اُزبکستان اور کینیڈا کے ایتھلیٹ پہلی اور دوسری پوزیشن پر آگئے۔
اپنی آخری اور فیصلہ کن تھرو میں حیدر علی نے 52.54 میٹر کی شاندار تھرو کرکے ایک بار پھر اپنی صلاحیتوں کا مظاہرہ کیا۔ اگرچہ یہ تھرو انہیں پہلی یا دوسری پوزیشن پر لے جانے کے لیے کافی نہیں تھی لیکن انہوں نے پاکستان کے لیے برونز میڈل حاصل کرکے تاریخ رقم کردی۔
یہ حیدر علی کا پیرالمپکس میں چوتھا میڈل ہے۔ اس سے قبل انہوں نے ٹوکیو پیرالمپکس میں گولڈ میڈل جیت کر پاکستان کا نام روشن کیا تھا۔
حیدر علی کی اس شاندار کامیابی پر پورے ملک میں خوشی کی لہر دوڑ گئی ہے اور انہیں مبارکباد دی جا رہی ہے۔
