چار سال بعد پی آئی اے کی یورپ واپسی، پروازوں کی بکنگ شروع

پاکستان انٹرنیشنل ایئرلائنز (پی آئی اے) نے یورپ کے لیے اپنی پروازوں کی بکنگ کا آغاز کر دیا ہے۔

ذرائع کے مطابق، 4 سال کے طویل وقفے کے بعد پی آئی اے کی پہلی پرواز جنوری 2025 میں پیرس کے لیے روانہ ہوگی۔ مسافروں کے لیے پیرس کی پرواز پی کے 719 کی بکنگ شروع ہو چکی ہے، جو 10 جنوری کو صبح 11 بجے اسلام آباد سے روانہ ہوگی۔

واضح رہے کہ چار سال قبل پائلٹس کے لائسنس سے متعلق تنازع کے بعد برطانیہ سمیت یورپ کے کئی ممالک نے پی آئی اے کی پروازوں پر پابندی عائد کر دی تھی۔

پی آئی اے کا دوبارہ یورپی فضائی حدود میں داخلہ قومی ایئر لائن کے لیے ایک اہم پیش رفت قرار دیا جا رہا ہے، جس کا مقصد بین الاقوامی معیار پر عمل پیرا ہو کر اپنی ساکھ کو بحال کرنا ہے۔