لاہور اور گجرات کے مختلف علاقوں سمیت کئی شہروں میں زلزلے کے جھٹکے محسوس کیے گئے، زلزلے کی شدت 5.1 ریکارڈ کی گئی ۔
زلزلے نے جہلم اور اس کے گردونواح، کمالیہ، خانیوال، چیچہ وطنی، بھلوال، چنیوٹ اور حافظ آباد کے علاقوں کو بھی متاثر کیا۔
زلزلے کے بعد شہری خوفزدہ ہو کر گھروں اور عمارتوں سے باہر نکل آئے اور کلمہ طیبہ کا ورد کرنے لگے۔ خوش قسمتی سے فوری طور پر کسی جانی یا مالی نقصان کی اطلاع موصول نہیں ہوئی۔
امریکی زلزلہ پیما مرکز کے مطابق زلزلے کی شدت 5.2 اور زیر زمین گہرائی 10 کلومیٹر ریکارڈ کی گئی، جبکہ پاکستانی زلزلہ پیما مرکز نے زلزلے کی شدت 5.1 اور مرکز کھاریاں کے قریب 15 کلومیٹر گہرائی میں بتایا ہے۔
تاحال زلزلے کے نقصانات کے حوالے سے مزید تفصیلات سامنے نہیں آئیں۔ حکام متاثرہ علاقوں میں صورتحال کا جائزہ لے رہے ہیں۔
