بلاوایو : پاکستان اور زمبابوے کے درمیان پہلے ون ڈے میچ میں 206 رنز کے ہدف کا تعاقب کرتے ہوئے پاکستانی ٹیم کی بیٹنگ جاری تھی کہ بارش کے باعث کھیل روکنا پڑا۔
پاکستان کی بیٹنگ لائن ایک بار پھر مشکلات کا شکار نظر آئی۔ 206 رنز کے ہدف کے تعاقب میں 59 کے مجموعی سکور پر پاکستان کے 6 کھلاڑی پویلین لوٹ چکے ہیں۔ اس وقت کریز پر محمد رضوان 18 رنز کے ساتھ موجود ہیں جبکہ عامر جمال ابھی تک بغیر کوئی رن بنائے کریز پر ہیں۔
قومی ٹیم کا مورال حالیہ آسٹریلیا کے خلاف ون ڈے سیریز جیتنے کے بعد بلند ہے۔ یہ عاقب جاوید کے ہیڈ کوچ بننے کے بعد پاکستانی ٹیم کا پہلا اسائنمنٹ بھی ہے۔
میچ کے آغاز میں پاکستان کی جانب سے اننگز کا آغاز صائم ایوب اور عبداللہ شفیق نے کیا، لیکن یہ جوڑی زیادہ دیر تک نہ چل سکی۔ عبداللہ شفیق ایک رن بنا کر 11 کے مجموعی سکور پر آؤٹ ہو گئے۔ صائم ایوب بھی 11 رنز بنا کر 17 کے مجموعی سکور پر کیچ آؤٹ ہو گئے۔
دیگر بیٹسمینوں میں کامران غلام نے 17 رنز بنائے جبکہ سلمان آغا 4، حسیب اللہ بغیر کوئی رن بنائے اور محمد حسنین 10 رنز کے ساتھ آؤٹ ہوئے۔
زمبابوے کی جانب سے بیٹنگ کرتے ہوئے اوپنرز نے جارحانہ آغاز کی کوشش کی، لیکن 40 کے مجموعی سکور پر جویلورڈ گمبی 15 رنز پر رن آؤٹ ہو گئے۔ ڈیون مائرز نے 8، کپتان کریگ ایروائن نے 6، تادیوانشے مارومانی نے 29، شان ولیمز نے 23، برائن بینیٹ نے 20، برینڈن ماوتا نے 1، اور بلیسنگ مزربانی بغیر کوئی رن بنائے آؤٹ ہوئے۔
زمبابوے کی بیٹنگ کو آٹھویں وکٹ کی شراکت میں سکندر رضا اور رچرڈ نگروا نے سہارا دیا۔ دونوں نے 62 رنز کی اہم پارٹنرشپ قائم کی۔ رضا نے 39 رنز کی اننگز کھیلی جبکہ نگروا 48 رنز کے ساتھ نمایاں رہے، جس میں 5 چوکے اور ایک چھکا شامل تھا۔
پاکستان کی جانب سے نائب کپتان سلمان علی آغا اور فیصل اکرم نے تین تین وکٹیں حاصل کیں، جبکہ حارث رؤف، عامر جمال اور محمد حسنین نے ایک ایک وکٹ لی۔
ٹاس کے موقع پر قومی ٹیم کے کپتان محمد رضوان نے کہا کہ آج تین کھلاڑی ڈیبیو کر رہے ہیں۔ انہوں نے کہا کہ ابتدائی اوورز میں بیٹنگ مشکل ہو سکتی ہے، لیکن ٹیم کے ساتھ بھرپور کوشش کریں گے۔
آج کے میچ میں ڈیبیو کرنے والے کھلاڑیوں میں عامر جمال، حسیب اللہ اور فیصل اکرم شامل ہیں، جبکہ بابر اعظم، شاہین شاہ آفریدی اور نسیم شاہ کو آرام دیا گیا ہے۔
صائم ایوب، عبداللہ شفیق، محمد رضوان (کپتان)، کامران غلام، عرفان خان نیازی، سلمان علی آغا، حسیب اللہ، عامر جمال، حارث رؤف، محمد حسنین، فیصل اکرم۔
