اسپیکر نے جوڈیشل کمیشن کے اراکین کے نام سپریم کورٹ کو بھیج دیے

اسپیکر قومی اسمبلی سردار ایاز صادق نے جوڈیشل کمیشن کے لیے حکومت اور اپوزیشن کے اراکین کے نام سپریم جوڈیشل کمیشن کو ارسال کر دیے ہیں۔

قومی اسمبلی کے ترجمان کے مطابق اسپیکر نے پارلیمانی جماعتوں کی جانب سے نامزدگیاں مکمل کیں اور اس ضمن میں ایک خط بھی لکھا۔ جوڈیشل کمیشن کے لیے قومی اسمبلی سے اپوزیشن لیڈر اور پاکستان تحریک انصاف کے رہنما عمر ایوب، مسلم لیگ (ن) کے شیخ آفتاب کو نامزد کیا گیا ہے، جبکہ خاتون نشست پر روشن خورشید بروچہ کی نامزدگی بھی کی گئی ہے۔

مزید برآں سینیٹ کی جانب سے جوڈیشل کمیشن کے لیے پاکستان پیپلز پارٹی کے سینیٹر فاروق نائیک اور پی ٹی آئی کے سینیٹر و اپوزیشن لیڈر شبلی فراز کو بھی نامزد کیا گیا ہے۔ قومی اسمبلی کے ترجمان کا کہنا ہے کہ تمام نامزدگیاں سیکریٹری جوڈیشل کمیشن کو بھیج دی گئی ہیں، جو سپریم کورٹ کو موصول ہو چکی ہیں۔

ترجمان نے مزید بتایا کہ اسپیکر نے چیئرمین سینیٹ سید یوسف رضا گیلانی اور تمام پارلیمانی جماعتوں سے مشاورت کے بعد نام بھیجے۔ 26ویں آئینی ترمیم کی منظوری کے بعد جوڈیشل کمیشن میں 5 اراکین پارلیمنٹ کو شامل کیا گیا ہے، اور ان ناموں میں حکومت اور اپوزیشن کی برابر کی نمائندگی موجود ہے۔

یاد رہے کہ پچھلے ہفتے، چیئرمین سینیٹ یوسف رضا گیلانی اور اسپیکر قومی اسمبلی سردار ایاز صادق نے 26ویں آئینی ترمیم کے تحت جوڈیشل کمیشن آف پاکستان کی تشکیل کے لیے حکومت اور اپوزیشن سے نام طلب کیے تھے۔

سپریم کورٹ کے ججز کی تعیناتی کے لیے ایک 13 رکنی جوڈیشل کمیشن قائم کیا جائے گا، جس کے سربراہ چیف جسٹس ہوں گے۔ 26ویں آئینی ترمیم کے تحت اس کمیشن میں چیف جسٹس پاکستان کے ساتھ تین سینئر ترین ججز بھی شامل ہوں گے، اور آئینی بینچ کا سینئر ترین جج بھی کمیشن کا رکن ہوگا۔

کمیشن کے اراکین میں وزیر قانون، اٹارنی جنرل، اور کم از کم 15 سالہ تجربہ رکھنے والے پاکستان بار کونسل کا ایک نمائندہ بھی شامل ہوگا۔ قومی اسمبلی اور سینیٹ سے 2 حکومتی اور 2 اپوزیشن اراکین بھی کمیشن کا حصہ ہوں گے، اور سینیٹ میں ٹیکنوکریٹ الیکشن لڑنے کے لیے اہل خاتون یا غیر مسلم کو بھی 2 سال کے لیے جوڈیشل کمیشن کا رکن بنایا جائے گا، جس کا تقرر چیئرمین سینیٹ کریں گے۔

یہ بات بھی اہم ہے کہ پاکستان کی تاریخ میں پہلی بار پارلیمانی کمیٹی کے ذریعے سپریم کورٹ کے چیف جسٹس کا انتخاب کیا جا رہا ہے۔ اس سے پہلے، الجہاد ٹرسٹ کیس کے فیصلے کی روشنی میں ملک کا چیف جسٹس ہمیشہ سپریم کورٹ کا سب سے سینیئر جج ہوتا تھا۔

26ویں آئینی ترمیم سے پہلے جسٹس منصور علی شاہ کو سنیارٹی اصول کے تحت اگلا چیف جسٹس بننا تھا، لیکن 22 اکتوبر کو چیف جسٹس کے تقرر کے لیے خصوصی پارلیمانی کمیٹی کی اکثریت نے جسٹس یحییٰ آفریدی کو اگلا چیف جسٹس نامزد کر دیا تھا۔

آئینی ترمیم میں سب سے زیادہ ترامیم آرٹیکل 175-اے میں کی گئی ہیں، جو سپریم کورٹ، ہائی کورٹس اور فیڈرل شریعت کورٹ میں ججوں کی تقرری کے عمل سے متعلق ہیں۔

جوڈیشل کمیشن آف پاکستان دراصل سپریم کورٹ، ہائی کورٹ، یا فیڈرل شریعت کورٹ کے ججوں کی ہر اسامی کے لیے اپنی نامزدگیاں 8 رکنی پارلیمانی کمیٹی کو بھیجتا تھا، جو یہ نام وزیر اعظم کو ارسال کرتی تھی، اور پھر وہ صدر کو بھیجتے تھے۔ تاہم، ترمیم کے بعد کمیشن اب اپنی نامزدگیاں براہ راست وزیر اعظم کو بھیجے گا، جو انہیں تقرری کے لیے صدر کو بھیجیں گے۔

ترمیم کے بعد خصوصی پارلیمانی کمیٹی میں قومی اسمبلی سے 8 اور سینیٹ کے 4 ارکان شامل ہوں گے، جن کی نمائندگی سیاسی جماعتوں کی بنیاد پر متناسب ہوگی، اور یہ ارکان ان کے متعلقہ پارلیمانی لیڈروں کی طرف سے نامزد کیے جائیں گے۔