یوٹیلیٹی اسٹورز کا چینی کی قیمتوں میں اضافے کا فیصلہ

یوٹیلیٹی اسٹورز کا چینی کی قیمتوں میں اضافے کا فیصلہ

لاہور : یوٹیلیٹی اسٹورز کارپوریشن نے چینی کی قیمتوں میں اضافے کا فیصلہ کر لیا ہے۔ ذرائع کے مطابق وزیرِ اعظم پیکیج کے تحت چینی کی فی کلو قیمت میں 5 روپے کا اضافہ کیا گیا ہے۔ اس فیصلے کے بعد یوٹیلیٹی اسٹورز پر بغیر سبسڈی والی چینی کی قیمت بھی فی کلو 5 روپے بڑھ جائے گی۔

یہ اضافہ آج سے نافذ ہو جائے گا جس کے بعد وزیرِ اعظم پیکیج کے تحت چینی کی قیمت 114 روپے فی کلو اور عام صارفین کے لیے 160 روپے فی کلو ہو جائے گی۔

یوٹیلیٹی اسٹورز کے ذرائع کا کہنا ہے کہ ٹرانسپورٹیشن چارجز میں اضافے کی وجہ سے چینی کی قیمتوں میں یہ اضافہ کیا گیا ہے۔ انہوں نے بتایا کہ گزشتہ کئی ہفتوں سے یوٹیلیٹی اسٹورز پر چینی کی فروخت بند تھی۔