بلوچستان کی ترقی اور عوام کی فلاح و بہبود ہماری اولین ترجیح ہے، وزیراعظم

اسلام آباد: وزیراعظم شہباز شریف نے کہا ہے کہ بلوچستان کی ترقی اور عوام کی فلاح و بہبود ہماری اولین ترجیح ہے۔

وزیراعظم محمد شہباز شریف سے گورنر بلوچستان جعفر خان مندوخیل کی ملاقات ہوئی، جس میں نائب وزیراعظم و وزیر خارجہ اسحاق ڈار اور پاکستان مسلم لیگ (ن) آزاد جموں و کشمیر کے صدر شاہ غلام قادر بھی موجود تھے۔

وزیراعظم شہباز شریف نے کہا کہ بلوچستان کے نوجوانوں کو روزگار کے مواقع فراہم کرنے کے لیے تمام ممکنہ اقدامات کیے جا رہے ہیں تاکہ وہ ملک کی ترقی میں فعال کردار ادا کر سکیں۔

ملاقات کے دوران بلوچستان کے ترقیاتی منصوبوں پر تبادلہ خیال کیا گیا، جس پر گورنر بلوچستان نے وزیراعطم شہباز شریف کا شکریہ ادا کیا۔

دریں اثنا، وزیراعظم شہباز شریف سے پاکستان مسلم لیگ (ن) آزاد جموں و کشمیر کے صدر شاہ غلام قادر نے ملاقات کی، جس میں آزاد جموں و کشمیر کے توانائی کے مسائل کے حل کے لیے 23 ارب روپے کے پیکیج کی فراہمی پر وزیراعظم کا شکریہ ادا کیا گیا۔

شہباز شریف نے اس موقع پر گفتگو کرتے ہوئے کہا کہ آزاد جموں و کشمیر کے عوام کو زیادہ سے زیادہ ریلیف فراہم کرنے کے لیے اپنی بھرپور کوشش کریں۔