ملک بھر میں سونے کی قیمت میں 31 سو روپے کا بڑا اضافہ

ملک بھر میں سونے کی قیمتوں میں ایک بار پھر بڑا اضافہ دیکھنے میں آیا ہے، جہاں فی تولہ سونا 31 سو روپے مہنگا ہو گیا ہے۔

رپورٹ کے مطابق آل پاکستان جیمز اینڈ جیولرز ایسوسی ایشن کا کہنا ہے کہ اس اضافے کے بعد فی تولہ سونے کی قیمت 2 لاکھ 80 ہزار 500 روپے تک پہنچ گئی ہے۔

اسی طرح، 10 گرام سونے کی قیمت میں بھی 2 ہزار 656 روپے کا اضافہ ہوا، جس کے بعد یہ 2 لاکھ 40 ہزار 484 روپے پر پہنچ گئی ہے۔

ایسوسی ایشن کے مطابق عالمی مارکیٹ میں سونے کی قیمت میں 31 ڈالرز کا اضافہ ریکارڈ کیا گیا، جس سے سونا 2 ہزار 700 ڈالر فی اونس پر فروخت ہو رہا ہے۔

گزشتہ روز بھی سونے کی قیمتوں میں اضافہ دیکھنے کو ملا تھا۔ آل سندھ صرافہ جیولرز ایسوسی ایشن نے بتایا تھا کہ 24 قیراط فی تولہ سونا ایک ہزار روپے بڑھ کر 2 لاکھ 77 ہزار 400 روپے کا ہو گیا تھا، جبکہ 10 گرام سونا 858 روپے اضافے کے ساتھ 2 لاکھ 37 ہزار 826 روپے پر فروخت ہوا تھا۔

علاوہ ازیں، 22 قیراط 10 گرام سونے کی قیمت بھی اضافے کے بعد 2 لاکھ 18 ہزار 7 روپے تک جا پہنچی تھی۔

چاندی کی قیمتیں، تاہم، مستحکم رہیں، جہاں فی تولہ چاندی 3 ہزار 400 روپے اور 10 گرام چاندی 2 ہزار 914 روپے پر برقرار رہی۔

ایسوسی ایشن نے یہ بھی رپورٹ کیا تھا کہ عالمی صرافہ مارکیٹ میں سونے کی قیمت میں 10 ڈالر کا اضافہ ہوا اور فی اونس سونا 2 ہزار 662 ڈالر تک جا پہنچا۔