رحیم یار خان میں ڈاکوؤں کا وحشیانہ حملہ، 11 پولیس اہلکار شہید
رحیم یار خان میں ڈاکوؤں کا وحشیانہ حملہ، 11 پولیس اہلکار شہید
رحیم یار خان: پنجاب کے ضلع رحیم یار خان میں ڈاکوؤں نے پولیس پر ایک انتہائی وحشیانہ حملہ کیا ہے جس میں 11 پولیس اہلکار شہید اور متعدد زخمی ہو گئے ہیں۔
واقعہ ضلع کے کچے کے علاقے ماچھکہ کیمپ 2 میں پیش آیا جہاں ڈاکوؤں نے نفری تبدیل کرنے والی پولیس موبائلوں کو راکٹ لانچروں سے نشانہ بنایا۔ پولیس ذرائع کے مطابق، ڈاکوؤں نے اس علاقے میں اپنی نقل و حرکت کو روکنے کے لیے قائم کیے گئے پولیس کیمپ پر اچانک حملہ کر دیا۔
حملے کے وقت کیمپ میں تقریباً 25 مسلح ڈاکو موجود تھے جنہوں نے پولیس اہلکاروں پر اندھا دھند فائرنگ کی۔ راکٹ لانچر کے حملے کے نتیجے میں متعدد پولیس موبائلیں تباہ ہو گئیں اور 11 اہلکار موقع پر ہی شہید ہو گئے۔ متعدد دیگر اہلکار زخمی ہوئے جنہیں فوری طور پر قریبی ہسپتال منتقل کیا گیا ہے۔
واقعے کی اطلاع ملتے ہی ضلع بھر سے پولیس کی بھاری نفری کو جائے وقوعہ پر طلب کر لیا گیا ہے۔ ضلعی پولیس آفیسر عمران خود بھی جائے وقوعہ پر پہنچ گئے ہیں اور صورتحال کا جائزہ لے رہے ہیں۔ زخمیوں کو طبی امداد فراہم کرنے کے لیے ایمبولینسز بھی جائے وقوعہ پر پہنچ چکی ہیں۔
