وزارت خزانہ کا ملازمین کو غیر قانونی طور پر اعزازیہ دینے کا انکشاف
وزارت خزانہ کا ملازمین کو غیر قانونی طور پر اعزازیہ دینے کا انکشاف
اسلام آباد : ملک کے مالیاتی نظم و ضبط کو برقرار رکھنے کی ذمہ داری سنبھالنے والی وزارت خزانہ خود ہی قواعد کی خلاف ورزی میں ملوث پائی گئی ہے۔
آڈیٹر جنرل آف پاکستان کی تازہ رپورٹ کے مطابق وزارت خزانہ نے مالی سال 2022-23 کے دوران اپنے ملازمین کو 24 کروڑ روپے سے زائد کا اعزازیہ بطور انعام دیا ہے۔
نجی ٹی وی کی رپورٹ کے مطابق یہ رقم ملازمین کو ان کی چار بنیادی تنخواہوں کے برابر دی گئی ہے اور یہ رقم ان کی باقاعدہ تنخواہوں میں شامل نہیں کی گئی تاکہ اس پر انکم ٹیکس نہ لگے۔
یہ بات قابلِ ذکر ہے کہ اعزازیہ عام طور پر کسی خاص کام یا کامیابی کے صلے میں دیا جاتا ہے، لیکن وزارت خزانہ کے ملازمین کو دیا جانے والا یہ اعزازیہ ان کے معمول کے فرائض کے بدلے میں دیا گیا ہے۔
آڈیٹر جنرل نے اپنی رپورٹ میں اس رقم کو واپس لینے کی سفارش کی ہے۔ اس انکشاف نے ملک میں ایک بار پھر کرپشن اور مالی بدعنوانی کے خلاف آوازیں بلند کر دی ہیں۔
