پاکستان-ایران اقتصادی تعاون کا نیا دور شروع، دوطرفہ تجارت میں تیزی کی توقع

اسلام آباد: پاکستان-ایران  نے دوطرفہ تجارت اور اقتصادی تعلقات کو نئی سطح پر لے جانے کے عزم کا اظہار کیا ہے۔ ایرانی صدر مسعود پیزشکیان کے دو روزہ دورۂ پاکستان کے دوران وفاقی وزیر تجارت جام کمال خان نے ایران کے وزیر صنعت و تجارت محمد اتابک سے اہم ملاقات کی۔

ملاقات کے دوران دونوں وزراء نے پاکستان اور ایران کے درمیان تاریخی، ثقافتی اور جغرافیائی رشتوں کا اعتراف کیا اور اس بات پر زور دیا کہ بدلتی ہوئی علاقائی صورتحال نے باہمی تعاون کے لیے نئے مواقع پیدا کیے ہیں۔

ایرانی وزیر محمد اتابک نے پاکستان کی تیز رفتار سفارتی و اقتصادی کوششوں کو سراہتے ہوئے کہا کہ
جو رفتار اب تک بنی ہے، وہ اسلام آباد کے فعال کردار کے بغیر ممکن نہ تھی۔ اب وقت ہے کہ اس کو عملی اور ساختی تجارتی نتائج میں بدلا جائے۔

جام کمال کا عملی اقدامات پر زور

وزیر تجارت جام کمال خان نے کہا کہ دونوں ممالک کے درمیان سفارتی خیرسگالی کو اب ٹھوس اقدامات میں بدلنے کی ضرورت ہے۔ انہوں نے مشترکہ اقتصادی کمیشن (JEC)، بزنس ٹو بزنس (B2B) ملاقاتوں اور مختلف شعبوں پر مشتمل تجارتی وفود کی تجویز دی تاکہ باہمی اقتصادی روابط کو مضبوط کیا جا سکے۔

انہوں نے کہا کہ ہمیں اس تجارتی اور اقتصادی تعاون کے لئے فوری طور پر عملی اقدامات کرنے چاہئیں۔

ترجیحی شعبے اور عملی تجاویز

ملاقات میں زراعت، لائیوسٹاک، توانائی اور سرحد پار لاجسٹکس جیسے اہم شعبوں کو ترجیح دینے پر اتفاق ہوا۔ وفاقی وزیر تجارت نے کامیاب تجارتی وفود کے ماڈل کی تجویز دی تاکہ مارکیٹ تک رسائی اور ریگولیٹری ہم آہنگی کو فروغ دیا جا سکے۔

وزراء نے موجودہ تجارتی راہداریوں اور سرحدی انفراسٹرکچر کو مکمل طور پر استعمال کرنے کی اہمیت پر زور دیا، جام کمال نے آسیان کی انٹرا ریجنل تجارت کی کامیابی سے موازنہ کیا۔ انہوں نے پاکستان اور ایران کے مشترکہ جغرافیائی فائدہ پر زور دیا، جسے انہوں نے "فاصلے کی رعایت” قرار دیا جس کا فائدہ وقت اور تجارتی اخراجات دونوں کو کم کرنے کے لیے لیا جانا چاہیے۔

یہ بھی پڑھیں: پاک-امریکا کرپٹو شراکت داری: تجارتی معاہدے کے بعد بلاک چین تعاون کا نیا دور شروع

دوطرفہ تجارت میں بڑے اہداف

وزیر تجارت نے کہا کہ باہمی تجارتی حجم آنے والے برسوں میں سالانہ 5 سے 8 بلین ڈالر تک پہنچ سکتا ہے، جو ترکی، وسطی ایشیا، روس اور مشرق وسطیٰ کے لیے ایک مربوط اور لچکدار اقتصادی بلاک کی بنیاد رکھ سکتا ہے۔

ایرانی وزیر اتابک نے ہر اعلیٰ سطحی دورے کے دوران ایک مخصوص بزنس ٹو بزنس دن کے انعقاد کی تجویز کی مکمل حمایت کی اور ایرانی تجارتی وفود کے دورہ پاکستان کی یقین دہانی کرائی۔ انہوں نے نئے دستخط شدہ تجارتی معاہدوں پر جلد از جلد عمل درآمد کی ضرورت پر زور دیا۔

جام کمال خان نے ایرانی بلوچ اہلکاروں کے ساتھ ایک ذاتی واقعہ شیئر کرتے ہوئے اس بات پر زور دیا کہ دونوں ممالک کے درمیان ثقافتی اور لسانی رشتے عوامی سطح پر مضبوط روابط کا ذریعہ بن سکتے ہیں۔

انہوں نے کہا کہ یہ صرف تجارت کا معاملہ نہیں، بلکہ لوگوں سے لوگوں کے تعلق کا سوال ہے۔ ہمارے تاجروں کے درمیان اعتماد اور ہم آہنگی پائیدار معاشی انضمام کی بنیاد بن سکتی ہے۔

اجلاس کے اختتام پر دونوں ممالک نے مشترکہ اقتصادی کمیشن کے آئندہ اجلاس کو جلد از جلد منعقد کرنے، تجارتی لاجسٹکس کو بہتر بنانے اور سرحدی سہولت کاری کے اقدامات کو ترجیح دینے پر اتفاق کیا۔

تجزیہ کاروں کا کہنا ہے کہ اقتصادی تعاون میں یہ پیش رفت

تجزیہ کاروں کا کہنا ہے کہ پاکستان اور ایران کے درمیان اقتصادی تعاون میں پیش رفت ایک اہم موڑ ثابت ہو سکتی ہے۔ دونوں ممالک کی قیادت کی سطح پر بڑھتی ہوئی ہم آہنگی اور عملی اقدامات کی طرف رجحان اس بات کا اشارہ ہے کہ باہمی تجارت محض اعلانات سے نکل کر عملی میدان میں داخل ہو رہی ہے۔

ماہرین کے مطابق اگر طے شدہ اقدامات، جیسے مشترکہ اقتصادی کمیشن کے اجلاس، بزنس ٹو بزنس رابطے، اور سرحدی سہولت کاری، بروقت اور مؤثر انداز میں نافذ ہو جائیں تو یہ نہ صرف دوطرفہ تجارت میں کئی گنا اضافہ کر سکتے ہیں بلکہ پورے خطے میں ایک مضبوط اقتصادی بلاک کے قیام کی بنیاد بھی رکھ سکتے ہیں۔