واٹس ایپ میں چیٹ کیلئے نئے فیچر کا اضافہ
واٹس ایپ میں چیٹ کیلئے نئے فیچر کا اضافہ
تفصیلات کے مطابق دنیا بھر میں سب سے زیادہ استعمال ہونے والی میسجنگ ایپ واٹس ایپ نے اپنے صارفین کے لیے ایک نئی اور دلچسپ خصوصیت متعارف کرانے کی تیاری کر لی ہے۔
واٹس ایپ میں اب رنگا رنگ چیٹ تھیمز کا اضافہ کیا جا رہا ہے جس سے صارفین اپنی چیٹ ونڈوز کو مزید دلکش اور منفرد بنا سکیں گے۔
واٹس ایپ بیٹا کے حالیہ ورژن میں متعارف کرائے گئے اس نئے فیچر کے ذریعے صارفین مختلف رنگوں اور آرٹسٹک تھیمز کا استعمال کرتے ہوئے اپنی پسند کی چیٹ تھیم کا انتخاب کر سکیں گے۔ اس سے ہر چیٹ ونڈو دوسری سے مختلف اور منفرد نظر آئے گی۔
واٹس ایپ میں پہلے سے صارفین چیٹ بیک گراؤنڈ کا انتخاب اور لائٹ اور کلر موڈز کا آپشن استعمال کر سکتے تھے، تاہم اب چیٹ تھیمز کے اضافے سے صارفین کو مزید اختیارات حاصل ہو جائیں گے۔
یہ فیچر پہلے سے ہی انسٹاگرام اور فیس بک میسنجر میں موجود ہے اور اب واٹس ایپ میں بھی اسے شامل کر کے میٹا نے اپنے تمام پلیٹ فارمز پر ایک جیسی خصوصیات کو یقینی بنانے کی کوشش کی ہے۔
واٹس ایپ میں چیٹ تھیمز کا فیچر انسٹاگرام اور میسنجر سے قدرے مختلف انداز میں کام کرے گا۔ جہاں انسٹاگرام اور میسنجر میں ڈیفالٹ چیٹ تھیم خودکار طور پر تمام چیٹس پر لاگو ہوتی ہے، وہیں واٹس ایپ میں صارفین انفرادی چیٹس کو الگ شکل دینے کے لیے مینوئل آپشن کا استعمال کر سکیں گے۔
واٹس ایپ کے آئی او ایس ڈیوائسز کے بیٹا ورژن میں یہ فیچر پہلے ہی متعارف کرایا جا چکا ہے اور اب اینڈرائیڈ ڈیوائسز کے لیے بھی اسے جاری کرنے کی تیاریاں کی جا رہی ہیں۔ اس سے واضح ہوتا ہے کہ یہ فیچر بہت جلد تمام صارفین کے لیے دستیاب ہو جائے گا۔
ماہرین کا کہنا ہے کہ چیٹ تھیمز کا اضافہ واٹس ایپ کو مزید دلکش اور صارف دوست بنانے میں مددگار ثابت ہوگا۔ اس سے صارفین کو اپنی چیٹس کو شخصی بنانے کا موقع ملے گا اور وہ اپنی پسند کے مطابق اپنی چیٹ ونڈوز کو ڈیزائن کر سکیں گے۔
واٹس ایپ کی جانب سے اس نئے فیچر کو متعارف کرانے کے بعد صارفین میں کافی جوش و خروش پایا جا رہا ہے۔ صارفین کا کہنا ہے کہ یہ فیچر واٹس ایپ کے استعمال کو مزید لطف اندوز بنانے میں مددگار ثابت ہوگا۔
