کیش لیس معیشت: وزیر اعظم نے مشرق ڈیجیٹل بینک کا افتتاح کر دیا

اسلام آباد: وزیراعظم شہباز شریف نے کیش لیس معیشت کے فروغ کے لئے مشرق ڈیجیٹل بینک کا افتتاح کر دیا۔

وزیراعظم شہباز شریف نے مشرق ڈیجیٹل بینک کی افتتاحی تقریب سے خطاب کرتے ہوئے کہا کہ مشرق ڈیجیٹل بینک کا قیام پاکستان کی معیشت کی مکمل ڈیجیٹلائزیشن اور جدید کاری میں سنگ میل ثابت ہوگا۔

انہوں نے ڈیجیٹلائزیشن کو جدید دور کی ضرورت قرار دیتے ہوئے مزید کہا کہ بینک کا قیام پاکستان میں کیش لیس معیشت کے فروغ اور مالیاتی شعبے کی ترقی کے لیے سنگ میل ثابت ہوگا۔

شہباز شریف نے کہا کہ نوجوان ملک کی آبادی کا ایک بڑا حصہ ہیں اور وہ ایک بہت بڑا اثاثہ اور موقع ہیں۔ انہوں نے مزید کہا کہ معیشت کو مضبوط بنانے، اسے شفاف بنانے اور ترقی کو فروغ دینے کے لیے اسے پیپر لیس بنانا ہوگا اور انسانی مداخلت کو کم کرنا ہوگا۔

وزیراعظم نے کہا کہ مشرق ڈیجیٹل بینک کا قیام پاکستان میں کیش لیس کاروبار اور مالیاتی شعبے کی ترقی اور فروغ میں سنگ میل ثابت ہوگا،مشرق بینک کے چیف ایگزیکٹو آفیسر نوجوان ہیں، پاکستان کی آبادی کا ایک بڑا حصہ نوجوانوں پر مشتمل ہے، یہ نوجوان ملک لئے ایک بڑا چیلنج اور عظیم موقع ہیں۔

انہوں نے کہا کہ گورنر سٹیٹ بینک باصلاحیت شخصیت ہیں، نئی مانیٹری پالیسی میں پالیسی ریٹ برقرار رکھا گیا ہے، ملک میں کاروباری، زرعی و صنعتی سرگرمیوں اور بینکاری نظام کو فروغ دینے کی ضرورت ہے۔

تقریب میں وفاقی وزیر خزانہ محمد اورنگزیب، وفاقی وزیر منصوبہ بندی و ترقی احسن اقبال، وفاقی وزیر پٹرولیم علی پرویز ملک، وفاقی وزیر ریلوے حنیف عباسی، وفاقی وزیر برائے بحری امور جنید انور، گورنر سٹیٹ بنک آف پاکستان جمیل احمد اور سیکرٹری خزانہ امام بودا اللہ نے بھی شرکت کی۔

یہ بھی پڑھیں: پانڈا بانڈز کے اجرا کی تیاری بھی زیر غور

وزیراعظم شہباز شریف نے پاکستان میں دوسرے ڈیجیٹل بینک مشرق ڈیجیٹل بینک کے قیام کا خیرمقدم کیا۔ انہوں نے کہا کہ متحدہ عرب امارات نے ہمیشہ پاکستان کی معاشی اور سماجی ترقی کی خواہش کی ہے اور دونوں ممالک کے درمیان تعلقات کو مضبوط بنانے میں متحدہ عرب امارات کے تاجروں کا اہم کردار ہے۔

وزیراعظم نے کہا کہ مشرق بینک ایک بڑا بینک ہے اور امید کرتے ہیں کہ پاکستان میں ڈیجیٹل بینک کے قیام سے مالیاتی شعبے میں عوام کو بہترین خدمات کی فراہمی کے حوالے سے بڑی تبدیلی آئے گی۔

حکومت معاشی استحکام کے لیے کوشاں ہے، وزیر خزانہ محمد اورنگزیب

وزیر خزانہ اورنگزیب نے کہا کہ وزیراعظم شہباز شریف کی قیادت میں حکومت معاشی استحکام کے لیے کوشاں ہے۔ انہوں نے کہا کہ بین الاقوامی ریٹنگ ایجنسیوں نے پاکستان کی بہتر معاشی کارکردگی کی تصدیق کی ہے جس سے ثابت ہوتا ہے کہ معیشت درست سمت میں جا رہی ہے۔

انہوں نے کہا کہ موجودہ حکومت ڈھانچہ جاتی اصلاحات متعارف کرا رہی ہے، توانائی، بینکاری نظام اور ایس او ایز کے حوالے سے مختلف اقدامات کیے جا رہے ہیں، ہم پالیسیوں کے تسلسل کو یقینی بنائیں گے،مشرق ڈیجیٹل بینک کی پاکستان کے مالیاتی شعبے میں شمولیت خوش آئند ہے،امید ہے مشرق ڈیجیٹل بینک پاکستان میں عوام کے لئے بہترین خدمات متعارف کرائے گا۔

مشرق بینک کے چیئرمین عبدالعزیز الغریر نے کہا کہ بینک پاکستان میں اپنے مالیاتی سفر کا آغاز کر رہا ہے اور اسے اصلاحات، اقتصادی ترقی اور غیر ملکی سرمایہ کاری کے لیے حکومت کی کوششوں کا حصہ بننے پر فخر ہے۔

مشرق بینک کے سی ای او محمد ہمایوں سجاد نے نوٹ کہاکہ پاکستان میں ڈیجیٹل ادائیگیوں میں گزشتہ سال 30 فیصد اضافہ ہوا ہے، اور نوجوان مالیاتی شعبے کا ڈیجیٹل مستقبل ہیں۔ تقریب کے اختتام پر وزیر اعظم شہباز شریف نے پاکستان میں بینک کا باضابطہ افتتاح کیا۔