پاکستان نے بھارتی پروازوں پر پابندی کی مدت میں توسیع کر دی

پاکستان نے اپنی فضائی حدود میں بھارتی پروازوں پر عائد پابندی کی مدت میں مزید اضافہ کر دیا ہے۔ ذرائع کے مطابق پاکستان ایئرپورٹس اتھارٹی نے واضح کیا ہے کہ یہ پابندی اب 24 جون 2025 کو صبح 4 بج کر 59 منٹ تک برقرار رہے گی۔

یہ فیصلہ تمام بھارتی رجسٹرڈ، آپریٹڈ، ملکیتی یا لیز پر لیے گئے ہوائی جہازوں پر لاگو ہو گا، جس میں بھارت کے فوجی طیارے بھی شامل ہیں۔

یاد رہے کہ یہ اقدامات اس وقت شروع ہوئے جب 23 اپریل کو بھارت نے پہلگام میں 26 سیاحوں کی مبینہ ہلاکت کے بعد سندھ طاس معاہدے کو اچانک معطل کر دیا تھا۔

جوابی اقدام کے طور پر پاکستان نے 24 اپریل کو بھارت کے لیے اپنی فضائی، زمینی اور تجارتی راہیں بند کر دیں۔ اسی روز بھارت کے سفارتی مشن میں عملے کی تعداد 30 افراد تک محدود کرنے کا اعلان بھی کیا گیا، جبکہ بھارتی فضائی، بحری اور دفاعی مشیروں کو "ناپسندیدہ افراد” قرار دے کر ملک چھوڑنے کا حکم دے دیا گیا تھا۔