علیزے شاہ کا چہرے کی سرجری سے متعلق افواہوں پر ردعمل

شوبز کی معروف شخصیت اور باصلاحیت اداکارہ علیزے شاہ نے اپنے چہرے کی سرجری سے متعلق افواہوں پر ردعمل دیتے ہوئے خبروں کو سراسر غلط قرار دے دیا۔ انہوں نے واضح کیا ہے کہ انہوں نے کوئی کاسمیٹک یا پلاسٹک سرجری نہیں کروائی۔

انسٹاگرام پر شیئر کی گئی ایک ویڈیو میں علیزے نے صاف الفاظ میں ان افواہوں کی تردید کی اور مداحوں سے درخواست کی کہ ان پر بے بنیاد باتیں نہ کی جائیں۔ ان کا کہنا تھا، "خدا کے لیے، میں نے کوئی سرجری نہیں کروائی، بس وزن کم کیا ہے، جس سے چہرہ قدرے مختلف دکھائی دیتا ہے۔”

اداکارہ نے یاد دلایا کہ جب انہوں نے ‘عہدِ وفا’ جیسے مقبول ڈرامے میں اداکاری کی تھی، تب وہ محض 17 برس کی تھیں۔ ان کے مطابق، اس وقت ان کے شناختی کارڈ نہ ہونے کی وجہ سے ان کی والدہ نے ان کا کانٹریکٹ سائن کیا تھا، اور سیٹ پر موجود تمام افراد اس بات کے گواہ ہیں۔

یہ بھی پڑھیں: پاکستان میں آن لائن پارٹ ٹائم کام کے 5 اصل طریقے

علیزے شاہ نے سوال اٹھایا کہ کیا کوئی یہ توقع کر سکتا ہے کہ ایک شخص چھ سال بعد بھی بالکل پہلے جیسا دکھے؟ "اب میں 23 سال کی ہوں، ظاہر ہے کہ وقت کے ساتھ چہرے میں فرق آنا ایک فطری عمل ہے”، انہوں نے کہا۔

چند دن قبل سینئر اداکارہ صبا فیصل نے ایک پروگرام میں اداکاراؤں کی ظاہری تبدیلیوں پر گفتگو کرتے ہوئے کہا تھا کہ علیزے شاہ میں اب صرف 20 فیصد قدرتی حسن باقی رہ گیا ہے، باقی سب کچھ "آرٹیفیشل” محسوس ہوتا ہے۔ علیزے شاہ کی یہ ویڈیو اسی تناظر میں سامنے آئی ہے، جس میں انہوں نے صاف کیا کہ ان کی تبدیلی مصنوعی نہیں بلکہ قدرتی عمل کا نتیجہ ہے۔