چیمپئنز ٹرافی :پاکستان نے ممکنہ اسکواڈ کا خاکہ پیش کر دیا
شاداب خان اور امام الحق کی ٹیم میں واپسی کا امکان، فخر زمان بھی نظر میں
منی ورلڈ کپ کے نام سے مشہور آئی سی سی چیمپئنز ٹرافی 2025 کا نواں ایڈیشن 19 فروری سے 9 مارچ تک پاکستان اور متحدہ عرب امارات میں کھیلا جائے گا۔ ٹیموں نے اس ایونٹ کے لیے اپنے اسکواڈز کا اعلان شروع کر دیا ہے، اور میزبان و دفاعی چیمپئن پاکستان کے اسکواڈ میں 7 بیٹسمین، 4 فاسٹ بولرز، 3 اسپنرز، اور ایک وکٹ کیپر کو شامل کیے جانے کا امکان ہے۔
پاکستان ٹیم کے کپتان محمد رضوان واحد وکٹ کیپر ہوں گے، جبکہ جنوبی افریقہ کے خلاف ون ڈے سیریز میں بطور دوسرے وکٹ کیپر شامل عثمان خان کو اسکواڈ میں شامل نہیں کیا جائے گا۔
**فاسٹ بولرز** میں شاہین شاہ آفریدی، نسیم شاہ، حارث رؤف کے ساتھ چوتھے فاسٹ بولر کے طور پر محمد حسنین کو شامل کیا جا سکتا ہے۔ اسپنرز میں ابرار احمد اور سفیان مقیم کے ساتھ سابق نائب کپتان شاداب خان کی واپسی کا قوی امکان ہے۔ شاداب خان کو 2024 میں ٹی 20 ورلڈ کپ کے بعد ٹیم سے ڈراپ کر دیا گیا تھا اور انہیں سینٹرل کنٹریکٹ کی "سی” کیٹیگری میں رکھا گیا تھا۔
ٹیم سے ڈراپ ہونے کے بعد شاداب نے فیصل آباد میں چیمپئنز ون ڈے کپ میں عمدہ کارکردگی کا مظاہرہ کیا، جہاں انہوں نے 5 میچوں میں 120 رنز بنائے اور 5 وکٹیں حاصل کیں۔ تاہم، راولپنڈی میں چیمپئنز ٹی 20 کپ میں ان کی کارکردگی کمزور رہی، جہاں انہوں نے 6 میچوں میں صرف 24 رنز بنائے اور صرف 18 گیندیں کرائیں۔
29 سالہ اوپننگ بیٹسمین امام الحق، جنہوں نے پاکستان کے لیے 72 ون ڈے میچوں میں 48.27 کی اوسط سے 3138 رنز بنائے ہیں، ان کی بھی ٹیم میں واپسی متوقع ہے۔ امام نے جنوبی افریقا کے خلاف 2023 کے ورلڈ کپ میں اپنا آخری ون ڈے میچ کھیلا تھا۔ ٹیم سے باہر ہونے کے بعد انہوں نے چیمپئنز ون ڈے کپ میں 53.00 کی اوسط سے 212 رنز اور چیمپئنز ٹی 20 کپ میں 9 میچوں میں 256 رنز اسکور کیے تھے۔
جارح مزاج اوپنر فخر زمانکی بھی اسکواڈ میں واپسی متوقع ہے۔ 34 سالہ فخر زمان، جنہوں نے 82 بین الاقوامی ون ڈے میچز کھیلے ہیں، کو حالیہ دوروں میں شامل نہیں کیا گیا تھا، لیکن چیمپئنز ٹی 20 میں مارخورز کے لیے 10 میچوں میں 303 رنز اسکور کیے اور دو نصف سنچریاں بنائیں، جس کے بعد ان کی واپسی کا امکان بڑھ گیا ہے۔
