2025 میں متعدد اینڈرائیڈ فونز پر واٹس ایپ سروس ختم ہونے کا اعلان

لاہور: سال 2025 کے آغاز پر متعدد اینڈرائیڈ اسمارٹ فونز پر واٹس ایپ سروس بند ہو جائے گی۔

میڈیا رپورٹس کے مطابق اینڈرائیڈ 4.4 کٹ کیٹ آپریٹنگ سسٹم والے موبائل فونز کی واٹس ایپ سپورٹ ختم کر دی جائے گی۔

یہ آپریٹنگ سسٹم تقریباً ایک دہائی قبل متعارف کرایا گیا تھا، اور ایسے تمام اسمارٹ فونز جو 2014 یا اس سے پہلے لانچ ہوئے، ان پر واٹس ایپ کا استعمال ممکن نہیں رہے گا۔

کمپنی کے مطابق یکم جنوری 2025 سے کئی سام سنگ ماڈلز سمیت دیگر برانڈز کے فونز واٹس ایپ سپورٹ سے محروم ہو جائیں گے۔ ان فونز میں سام سنگ گلیکسی ایس 3، گلیکسی نوٹ 2، گلیکسی ایس 4 منی، موٹرولا موٹو جی (فرسٹ جنریشن)، ریزر ایچ ڈی، موٹو ای 2014، ایچ ٹی سی ون ایکس، ون ایکس پلس، ڈیزائر 500 اور ڈیزائر 601 شامل ہیں۔

یہ بھی پڑھیں: مریم نفیس کو ’بے بی بمپ‘ کے ساتھ ویڈیو شیئر کرنے پر شدید تنقید کا سامنا

اسی طرح ایل جی کے آپٹیمس جی، نیکسز 4، جی 2 منی، ایل 90 جبکہ سونی کے ایکسپیریا زی، ایکسپیریا ایس پی، ایکسپیریا ٹی اور ایکسپیریا وی اسمارٹ فونز بھی واٹس ایپ سروس سے محروم ہو جائیں گے۔

اگر صارفین ان پرانے فونز کو استعمال کر رہے ہیں، تو انہیں واٹس ایپ ڈیٹا فوری طور پر کسی نئے ڈیوائس میں منتقل کرنا ہوگا۔ بصورتِ دیگر، یکم جنوری کے بعد ان کا واٹس ایپ ڈیٹا، بشمول چیٹ ہسٹری اور میڈیا، مستقل طور پر ضائع ہو جائے گا۔