لاہور شہر کو پاکستان کا پہلا جدید ترین اسمارٹ سٹی بنانے کا فیصلہ

چین کی معروف ٹیکنالوجی کمپنی کے اشتراک سے لاہور کو پاکستان کا پہلا جدید ترین اسمارٹ سٹی بنانے کا فیصلہ کر لیا گیا ہے۔

وزیر اعلیٰ پنجاب مریم نوازنے شنگھائی کے لونگ گانگ ڈسٹرکٹ میں چین کی ایک بڑی ٹیکنالوجی کمپنی کا دورہ کیا، جہاں ان کا پرتپاک استقبال کیا گیا۔ اس موقع پر پنجاب حکومت اور چینی کمپنی کے درمیان لاہور کو اسمارٹ سٹی میں تبدیل کرنے کا اہم فیصلہ کیا گیا۔

وزیر اعلیٰ مریم نواز نے چینی ٹیکنالوجی کمپنی کو پنجاب میں سرمایہ کاری کرنے کی دعوت دی اور انہیں نواز شریف آئی ٹی سٹی میں دفتر قائم کرنے کے لیے ہر ممکن تعاون کی پیشکش کی۔ انہوں نے کمپنی کو پنجاب میں اسمبلنگ اور مینوفیکچرنگ پلانٹ لگانے اور ریٹیل آفس کے قیام کے ساتھ آفٹر سیل سروس سینٹر کھولنے کی بھی دعوت دی۔

دورے کے دوران مریم نواز نے چینی ٹیکنالوجی کمپنی کے گورنمنٹ افیئرز کے صدر وانگ چینگ ڈونگ سے ملاقات کی۔ ملاقات میں لاہور کو ایک جدید ڈیجیٹل سٹی میں تبدیل کرنے کے لیے مختلف تجاویز پر تبادلہ خیال کیا گیا۔ وزیر اعلیٰ نے وانگ چینگ ڈونگ کو لاہور آنے کی دعوت بھی دی۔

ملاقات میں ای کامرس، ایکو سسٹم پروڈکشن، اور صحت و تعلیم کے شعبوں کی ڈیجیٹلائزیشن پر بھی تفصیلی گفتگو کی گئی، جس سے دونوں ممالک کے درمیان تکنیکی تعاون کو مزید فروغ ملے گا۔