عدالت نے آوارہ کتوں کو مارنے کی مہم فوری روکنے کا حکم

راولپنڈی: لاہور ہائی کورٹ کے راولپنڈی بینچ نے آوارہ کتوں کو مارنے کی مہم فوری طور پر روکنے کے احکامات جاری کر دیئے۔

لاہور ہائی کورٹ کے راولپنڈی بینچ کے جسٹس جواد حسن نے آوارہ کتوں کو مارنے کے خلاف التمش سعید کے توسط سے انیلہ عمر کی درخواست پر سماعت کی۔

عدالت نے راولپنڈی کی انتظامیہ کو 24 دسمبر تک آوارہ کتوں کو مارنے سے منع کرتے ہوئے فریقین کو نوٹس جاری کیے ہیں۔

عدالت نے ایڈووکیٹ جنرل پنجاب کو بھی قانونی نکات پر معاونت کے لیے نوٹس جاری کیے ہیں۔ درخواست میں حکومت پنجاب، لائیو اسٹاک، کمشنر، ڈی سی سمیت دیگر کو فریق بنایا گیا تھا۔

درخواست گزار نے الزام لگایا کہ انتظامیہ نے کتا مار مہم کے لیے ٹینڈر جاری کیا ہے، جس میں 5 ہزار 200 کتوں کی ویکسی نیشن کے لیے ایک کروڑ 4 لاکھ روپے کا ٹینڈر دیا گیا ہے، لیکن یہ ٹینڈر کتوں کی ویکسی نیشن کے لیے نہیں بلکہ انہیں مارنے کے لیے جاری کیا گیا ہے۔