گوگل کروم نے نیا فیچر متعارف کردیا

گوگل کروم نے ایک نیا فیچر متعارف کرادیا ہے جس کا مقصد صارفین کو انٹرنیٹ پر محفوظ سرفنگ میں مدد فراہم کرنا ہے۔

اسٹور ریویوز نامی یہ فیچر مصنوعی ذہانت (اے آئی) ٹیکنالوجی کا استعمال کرتے ہوئے آزاد ذرائع سے ویب سائٹس کے ریویوز کو اکٹھا کرتا ہے اور ان کی سمری فراہم کرتا ہے، تاکہ صارفین کو ویب سائٹس کی قابل اعتباریت کا اندازہ ہو سکے۔

اس فیچر کا مقصد ویب سائٹس کی ساکھ کی تصدیق کا عمل آسان بنانا ہے، خاص طور پر آن لائن خریداری اور سروسز کے حوالے سے۔ "اسٹور ریویوز” فیچر صارفین کو ویب سائٹس کے بارے میں یوزر فیڈبیک کی سمری دکھائے گا، جس کے ذریعے وہ ویب سائٹس کی قابل اعتمادیت کا فوری جائزہ لے سکیں گے۔

یہ ڈیٹا قابل اعتماد ریویو پلیٹ فارمز سے حاصل کیا جائے گا، اور صارفین کو اصل ماخذ پر جا کر تفصیلات تک رسائی حاصل کرنے کا اختیار بھی ہوگا۔ اس فیچر سے صارفین کے لیے ویب سائٹ کی ساکھ جانچنا آسان ہو جائے گا، جس سے حساس معلومات شیئر کرنے سے قبل تحفظ کی ضمانت ملے گی۔

فی الحال یہ فیچر محدود صارفین کے لیے دستیاب ہے، تاہم توقع ہے کہ یہ آنے والے ہفتوں میں تمام صارفین کے لیے متعارف کرایا جائے گا۔