ٹرمپ کا مائیکل فول کینڈر کو نائب وزیر خزانہ نامزد کرنے کا اعلان

نومنتخب امریکی صدر ڈونلڈ ٹرمپ نے میری لینڈ یونیورسٹی کے پروفیسر مائیکل فول کینڈر کو نائب وزیر خزانہ کے عہدے کے لیے نامزد کر دیا۔

امریکی میڈیا رپورٹس کے مطابق ٹرمپ نے ایک سوشل میڈیا پوسٹ میں کہا کہ مائیکل فول کینڈر ان کے "امریکا فرسٹ” ایجنڈے کو آگے بڑھائیں گے۔ انہوں نے مائیکل فول کینڈر کو ایک ماہر معاشیات اور پالیسی پریکٹیشنر کے طور پر سراہا۔ اسی دوران، ٹرمپ نے گیل سلیٹر کو اینٹی ٹرسٹ ڈویژن کے لیے نائب اٹارنی جنرل منتخب کر لیا ہے۔

اس سے قبل ڈونلڈ ٹرمپ نے اپنے داماد جیرڈ کشنر کے والد، چارلس کشنر، کو فرانس میں امریکی سفیر مقرر کر دیا تھا۔

برطانوی نشریاتی ادارے کی رپورٹ کے مطابق ٹرمپ نے اعلان کیا تھا کہ چارلس کشنر اب فرانس میں امریکی سفارتخانے کی نمائندگی کریں گے۔ چارلس کشنر، جو ایک مشہور رئیل اسٹیٹ ڈویلپر ہیں، جیرڈ کشنر کے والد اور ایوانکا ٹرمپ کے سسر ہیں۔ چارلس کشنر ماضی میں ٹیکس چوری کے الزام میں ایک سال جیل میں رہ چکے ہیں۔ تاہم، ٹرمپ نے اپنی پہلی صدارتی مدت کے آخری دنوں میں انہیں معاف کر دیا تھا۔