آئی ایم ایف پروگرام پر کامیابی سے عمل درآمد ہو رہا ہے،وزارت خزانہ

وزارت خزانہ نے واضح کیا ہے کہ عالمی مالیاتی فنڈ (آئی ایم ایف) کے ساتھ جاری پروگرام پر کامیابی سے عمل درآمد ہو رہا ہے اور 37 ماہ پر محیط یہ پروگرام اپنے طے شدہ اہداف کے مطابق کامیابی سے مکمل کیا جائے گا۔

وزارت خزانہ کے جاری کردہ بیان میں کہا گیا کہ حکومت آئی ایم ایف کے ساتھ طے شدہ اہداف کو پورا کرنے کے لیے پُرعزم ہے اور عالمی مالیاتی فنڈ کے ساتھ مسلسل مشاورت و روابط کے ذریعے اس طویل پروگرام کو کامیابی سے مکمل کیا جائے گا۔

وفاقی وزیر خزانہ محمد اورنگزیب نے قومی اسمبلی کی اسٹینڈنگ کمیٹی برائے خزانہ کو بریفنگ دیتے ہوئے اس پروگرام کی اہمیت اور ملک کی معاشی استحکام کے لیے اس کی ضرورت پر زور دیا۔ انہوں نے کہا کہ آئی ایم ایف پروگرام معاشی استحکام کے لیے کلیدی حیثیت رکھتا ہے اور اس پر عمل درآمد کے لیے حکومت اپنی پوزیشن میں ثابت قدم ہے۔

وزارت خزانہ کے بیان میں کہا گیا کہ آئی ایم ایف پروگرام پر عمل درآمد کے حوالے سے جو قیاس آرائیاں کی جا رہی ہیں، وہ محض افواہیں ہیں اور ان کا حقیقت سے کوئی تعلق نہیں۔ حکومت نے اس بات کو دہراتے ہوئے کہا کہ آئی ایم ایف پروگرام کے کامیاب نفاذ کے لیے حکومت تمام تر توانائیاں صرف کر رہی ہے۔

بیان میں مزید کہا گیا کہ حکومت معاشی استحکام کے حصول کے لیے آئی ایم ایف سے طے شدہ اہداف کی تکمیل میں پوری شدت اور شفافیت کے ساتھ کام کر رہی ہے تاکہ پاکستان کا معاشی مستقبل مستحکم اور پائیدار ہو۔