پاکستان اور زمبابوے کے درمیان ون ڈے سیریز کا پہلا مقابلہ آج ہو گا

پاکستان اور زمبابوے کے درمیان تین میچوں کی ون ڈے سیریز کا پہلا مقابلہ آج بلاوایو میں کھیلا جائے گا۔ یہ میچ پاکستانی وقت کے مطابق دوپہر 12:30 بجے شروع ہوگا۔

پاکستانی ٹیم حال ہی میں ورلڈ چیمپئن آسٹریلیا کو ہوم گراؤنڈ پر ون ڈے سیریز میں شکست دے کر آئی ہے، جس کی بدولت ٹیم کا مورال بلند ہے۔ یہ سیریز قومی ٹیم کے نئے ہیڈ کوچ عاقب جاوید کے لیے پہلا غیر ملکی اسائنمنٹ بھی ہے۔

زمبابوے کے خلاف اس سیریز میں پاکستان نے اپنے تین اہم کھلاڑی بابر اعظم، شاہین شاہ آفریدی، اور نسیم شاہ کو آرام دیا ہے، جبکہ نوجوان کھلاڑیوں کو میدان میں اترنے کا موقع فراہم کیا گیا ہے۔

کپتان محمد رضوان نے میڈیا سے گفتگو کرتے ہوئے کہا کہ آسٹریلیا کی سیریز ماضی کا حصہ بن چکی ہے اور زمبابوے سیریز آئی سی سی چیمپئنز ٹرافی کی تیاری کا حصہ ہے۔ ان کا کہنا تھا کہ ٹیم جیت کے لیے پرعزم ہے۔

پاکستان نے بالنگ اٹیک میں حارث رؤف، محمد حسنین، شاہ نواز دھانی، احمد دانیال، اور عامر جمال کو شامل کیا ہے، جبکہ اسپن ڈیپارٹمنٹ میں ابرار احمد اور نوجوان فیصل اکرم ایکشن میں نظر آئیں گے۔ بیٹنگ لائن اپ میں محمد رضوان کے ساتھ صائم ایوب، عبداللّٰہ شفیق، کامران غلام، سلمان علی آغا، عرفان نیازی، اور حسیب اللّٰہ اہم کردار ادا کریں گے۔

اب تک دونوں ٹیموں کے درمیان 62 ون ڈے میچز کھیلے گئے ہیں، جن میں سے پاکستان نے 54 اور زمبابوے نے 5 میچز جیتے ہیں، جبکہ 2 میچز بے نتیجہ رہے۔