دنیا کی بہترین عمارت کا اعزاز آسٹریلوی سکول کے نام

سڈنی: دنیا کی سب سے خوبصورت عمارت کا اعزاز ایک آسٹریلوی سکول نے اپنے نام کر لیا۔

غیر ملکی میڈیا کے مطابق سڈنی کے مضافاتی علاقے چیپینڈیل میں واقع ڈارلنگٹن پبلک سکول نے اپنی شاندار تعمیرات کے ذریعے تمام بلند و بالا عمارتوں کو پیچھے چھوڑ دیا۔

سنگاپور میں ہونے والے ’ورلڈ آرکیٹیکچر فیسٹیول‘ میں 220 متاثر کن عمارتوں میں سے ڈارلنگٹن پبلک سکول نے ’ورلڈ بلڈنگ آف 2024‘ کا اعزاز جیت لیا۔

اس سکول کی عمارت نے 2013 میں بھی آکلینڈ آرٹ گیلری توئی او تماکی میں پہلا انعام حاصل کیا تھا، اور اب یہ ایک بار پھر عالمی سطح پر سراہا گیا ہے۔

یہ عمارت ایک پرانی عمارت تھی جسے سڈنی کے ماہر آرکیٹیکٹس نے جدید اور دلکش انداز میں ڈیزائن کیا۔ عمارت کی چھت ایک خاص ساؤتھ ٹوتھ ڈیزائن میں بنائی گئی ہے۔ سکول میں بچوں کے کھیلنے کے لیے ایک بڑا باسکٹ بال کورٹ اور ایک کمیونٹی گارڈن بھی موجود ہے۔

’ورلڈ آرکیٹیکچر فیسٹیول‘ میں 18 مختلف کیٹیگریز میں ایوارڈز دیے گئے، جن میں سنگاپور میں بزرگ شہریوں کے لیے تعمیر کردہ ہاؤسنگ کمپلیکس اور کوپن ہیگن میں چھت پر بنایا گیا ویسٹ ٹو انرجی پاور پلانٹ بھی شامل ہیں، جنہیں ان کی تخلیقی اور پائیدار ڈیزائن کے لیے سراہا گیا۔