پاکستان میں پولیو کا ایک اور کیس رپورٹ، تعداد 50 ہو گئی

اسلام آباد میں واقع نیشنل انسٹی ٹیوٹ آف ہیلتھ کی پولیو کے خاتمے کے لیے قائم ریجنل ریفرنس لیبارٹری نے پاکستان میں ایک اور وائلڈ پولیو وائرس (ڈبلیو پی وی 1) کے کیس کی تصدیق کی ہے۔ اس بار خیبرپختونخوا کے ضلع ٹانک سے ایک بچی میں پولیو کی تصدیق ہوئی ہے، جس کے بعد رواں سال ملک میں پولیو کے کیسز کی تعداد 50 ہوگئی ہے۔

لیبارٹری سے موصول ہونے والے نمونوں کی جینیاتی سیکوینسنگ سے یہ بات سامنے آئی ہے کہ یہ وائرس جولائی میں اسی علاقے سے سامنے آنے والے وائلڈ پولیو وائرس (ڈبلیو پی وی 1) کے ساتھ جینیاتی طور پر منسلک ہے۔

ٹانک سے یہ پولیو کا دوسرا کیس ہے، اور پاکستان میں 2024 کے دوران 50واں پولیو کیس ہے۔ ملک بھر میں پولیو کے کیسز کی رپورٹنگ میں خیبرپختونخوا کی صورتحال زیادہ تشویش کا باعث ہے، جہاں اب تک 11 کیسز رپورٹ ہوچکے ہیں۔

پاکستان میں پولیو کے کیسز مختلف صوبوں سے سامنے آچکے ہیں، جن میں بلوچستان سے 24، سندھ سے 13، خیبرپختونخوا سے 11، اور پنجاب اور اسلام آباد سے ایک، ایک کیس شامل ہے۔

ٹانک ضلع جنوبی خیبرپختونخوا کے ان علاقوں میں شامل ہے جہاں پولیو کا پھیلاؤ خاصا سنگین ہے، اور یہاں سے اس سال کئی مثبت ماحولیاتی نمونے بھی مل چکے ہیں۔