ٹرمپ دوسری مرتبہ امریکا کے صدر منتخب

امریکی صدر کے انتخاب میں تمام 50 ریاستوں کی پولنگ کے نتائج کے مطابق ڈونلڈ ٹرمپ نے میدان مار لیا ہے۔

امریکی صدارتی انتخاب میں 538 میں سے اب تک ٹرمپ نے 277 اور کملا ہیرس نے 226 الیکٹورل ووٹ حاصل کیے ہیں۔

انتخابی نتائج کے مطابق ایوان نمائندگان میں ری پبلکن 188 اور ڈیموکریٹس 160 نشستوں پر کامیاب ہو چکے ہیں۔ اس دوران 50 ریاستوں میں سے 27 ریاستوں میں ٹرمپ کامیاب ہوئے ہیں جبکہ 19 ریاستوں میں کملا ہیرس نے کامیابی حاصل کی ہے۔

سینیٹ میں ری پبلکن پارٹی نے 51 نشستوں کے ساتھ اکثریت حاصل کر لی ہے، جب کہ ڈیموکریٹس نے ایوان بالا کی 43 نشستیں جیت لی ہیں۔

ٹرمپ نے کامیابی کے بعد فلوریڈا کے پام بیچ پر اپنے حامیوں سے خطاب کرتے ہوئے کہا، "آج ہم نے تاریخ رقم کی ہے، امریکا نئی بلندیوں کو چھوئے گا۔” ان کا مزید کہنا تھا کہ "ہم ملک کے تمام مسائل کو حل کریں گے اور ایسی کامیابی پہلے کبھی نہیں دیکھی گئی۔ امریکا کو محفوظ، مضبوط اور خوشحال بنائیں گے۔” انہوں نے اپنے حامیوں کا شکریہ ادا کرتے ہوئے کہا کہ "آپ کے ووٹ کے بغیر یہ کامیابی ممکن نہیں تھی۔”

امریکا میں پولنگ کا عمل مختلف ریاستوں میں مختلف اوقات پر ختم ہوا ہے کیونکہ ملک میں 6 مختلف ٹائم زون ہیں۔ اس کے مطابق نتائج کا اعلان مختلف اوقات میں کیا گیا۔

اس دوران 7 کروڑ 89 لاکھ افراد پہلے ہی اپنے ووٹ کاسٹ کر چکے تھے۔ کامیابی کے لیے کسی بھی امیدوار کو 270 الیکٹورل ووٹ درکار تھے، جو ٹرمپ نے حاصل کر لیے ہیں۔

آج کے انتخابات میں ایوان نمائندگان کے 435 ارکان کا انتخاب بھی ہو رہا ہے، اور ایوان نمائندگان میں اکثریت حاصل کرنے کے لیے 218 نشستیں درکار ہیں۔

سینیٹ کے 100 ارکان میں سے 34 کا انتخاب بھی آج ہو رہا ہے۔ اس وقت سینیٹ میں ری پبلکن کے پاس 38 اور ڈیموکریٹس کے پاس 28 نشستیں ہیں، جب کہ 11 ریاستوں میں گورنر کے انتخاب بھی جاری ہیں۔

امریکا میں 47 ویں صدر کے انتخاب کے لیے پولنگ کا عمل مختلف اوقات میں مکمل ہوا۔ انڈیانا اور کینٹکی میں پاکستانی وقت کے مطابق صبح 4 بجے پولنگ کا وقت ختم ہوا، جب کہ ہوائی، الاسکا اور دیگر مغربی ریاستوں میں یہ وقت پاکستانی وقت کے مطابق صبح 5 بجے تھا۔ اسی طرح جارجیا اور نیو کیرولائنا میں پولنگ کا اختتام پاکستانی وقت کے مطابق صبح 6 سے 7 بجے کے درمیان ہوا۔ مشی گن، پنسلوینیا اور وسکونسن میں پولنگ پاکستانی وقت کے مطابق صبح 7 سے 8 بجے تک جاری رہی، جبکہ الاسکا میں پاکستانی وقت کے مطابق صبح 11 بجے پولنگ کا وقت ختم ہوا۔