پی ٹی اے نے فوت شدہ افراد کے نام پر جاری سمز بند کرنا شروع کر دیئے

اسلام آباد: پاکستان ٹیلی کمیونیکیشن اتھارٹی (پی ٹی اے) نے غیرقانونی سمز کے خلاف اپنی مہم تیز کر دی ہے۔ آج سے فوت شدہ افراد کے نام پر جاری سمز کو بند کر دیا جائے گا۔

پی ٹی اے نے نادرا سے حاصل کردہ ڈیٹا کی مدد سے یہ کارروائی شروع کی ہے۔ اس سے قبل پی ٹی اے 2017 سے پہلے کے زائد المیعاد شناختی کارڈز پر جاری سمز اور جعلی شناختی کارڈز پر جاری تقریباً 70 ہزار سمز کو بھی بلاک کر چکا ہے۔

فوت شدہ افراد کے اہل خانہ کو اپنی سمز کو اپنے نام منتقل کرنے کے لیے 15 اکتوبر تک کا وقت دیا گیا تھا۔

اس مدت کے دوران اہل خانہ فوت شدہ فرد کا ڈیتھ سرٹیفکیٹ، اپنا شناختی کارڈ اور سمز کو اپنے نام منتقل کرنے کی درخواست دے کر یہ عمل مکمل کر سکتے تھے۔

پی ٹی اے کا کہنا ہے کہ اس مہم کا مقصد موبائل نیٹ ورک کو محفوظ بنانا اور غیر قانونی سرگرمیوں کو روکنا ہے۔