دفعہ 144 نافذ: لاہور میں 6 دن کیلئے سیاسی و سماجی سرگرمیوں پر پابندی

لاہور: پنجاب حکومت نے لاہور میں امن و امان کی صورتحال کو دیکھتے ہوئے ایک اہم فیصلہ کرتے ہوئے 6 دن کیلئے دفعہ 144 نافذ کر دی ہے۔

محکمہ داخلہ پنجاب کی جانب سے جاری نوٹیفکیشن کے مطابق یہ پابندی 3 اکتوبر سے 8 اکتوبر تک نافذ رہے گی۔ اس دوران لاہور میں ہر قسم کے سیاسی اجتماعات، دھرنے، جلسے، مظاہرے اور احتجاج پر پابندی عائد ہوگی۔

حکومت کا کہنا ہے کہ یہ اقدام امن و امان کو برقرار رکھنے اور کسی بھی ناخوشگوار واقعے کو روکنے کے لیے اٹھایا گیا ہے۔

نوٹیفکیشن میں واضح کیا گیا ہے کہ سکیورٹی کے پیش نظر کوئی بھی عوامی اجتماع دہشت گردوں کے لیے نشانہ بن سکتا ہے، اسی لیے یہ احتیاطی اقدام اٹھایا گیا ہے۔

لاہور کی ضلعی انتظامیہ کی سفارش پر یہ فیصلہ کیا گیا ہے اور محکمہ داخلہ نے اس حوالے سے ایک نوٹیفکیشن جاری کر دیا ہے۔