فلسطینیوں سے اظہار یکجہتی،بھارتی شاعرہ کی امریکی تنظیم کا ایوارڈ لینے سے معذرت
یو ایس ایڈ غزہ میں بچوں کے قتل عام کا سبب بننے والی اسلحہ ساز کمپنیوں سے کاروبار کر تی ہے،شاعرہ
ممبئی: بھارتی شاعرہ جسینتا کرکیٹا نے غزہ میں بچوں کے قتل عام اور جنگی جرائم کے مرتکب اسرائیل کی پشت پناہی کیخلاف، مظلوم فلسطینی عوام سے اظہار یکجہتی کرتے ہوئے امریکی تنظیم کا ایوارڈ لینے سے معذرت کرلی۔
بھارت کی ایک غیر سرکاری تنظیم نے یو ایس ایڈ کے تعاون سے اپنے ’روم ٹو ریڈ ینگ آتھر ایوارڈ 2024‘ کیلئے جسینتا کرکیٹا بچوں کیلئے ان کی شاعری کے مجموعے ’جِرہْل‘ پر ایوارڈکیلئے منتخب کیا گیا تھا۔
جسینتا کرکیٹا نے یو ایس ایڈ کے غزہ جنگ میں کردار ادا کرنے والی اسلحہ ساز کمپنیوں کیساتھ تعلقات کی بنیاد پر ایوارڈ لینے سے معذرت کرلی۔
جسینتا کرکیٹا کا کہنا تھا کہ مجھے ایوارڈ کیلئے منتخب کرنے والی مقامی تنظیم بچوں کی تعلیم کیلئے کام کرتی ہے لیکن اس کی فنڈنگ یو ایس ایڈ جیسی تنظیم کر رہی ہے جو کہ غزہ میں بچوں کے قتل عام کا سبب بننے والی اسلحہ ساز کمپنیوں سے کاروبار کر تی ہے۔
انہوں نے کہا کہ اسلحہ سازی کا کاروبار اور بچوں کی پرواہ ایک ساتھ کیسے جاری رہ سکتے ہیں جب ان ہی ہتھیاروں سے بچوں کی دنیا کو تباہ و برباد کیا جا رہا ہو۔
انہوں نے کہا کہ بچوں کیلئے کتابیں اہم ہیں لیکن فلسطین میں ہزاروں بچے قتل کردیے گئے لیکن بڑے ان بچوں کی حفاظت نہیں کر پائے۔
اس سے قبل بھارتی نسل سے تعلق رکھنے والی برطانوی نژاد امریکی خاتون مصنفہ جھمپا لہری نے بھی کفایہ اسکارف پہننے پر فلسطینی ملازمین کی برطرفی کیخلاف احتجاج کرتے ہوئے نیویارک کے ناگوچی میوزیم کو ایوارڈ واپس کردیا تھا۔
