اسلام آباد: نائب وزیراعظم اور وزیرخارجہ اسحاق ڈار نے کہا ہے کہ پاکستان اور روس کے تعلقات درست سمت میں جا رہے ہیں اور آج کی ملاقات میں ڈپٹی وزیراعظم روس سے تفصیلی گفتگو ہوئی ہے۔روس کے ساتھ تجارت اور توانائی کے شعبوں میں تعاون بڑھائیں گے۔
اسلام آباد میں نائب وزرائے اعظم پاکستان اور روس نے مشترکہ پریس کانفرنس کی اور اس موقع پر نائب وزیراعظم اور وزیرخارجہ اسحاق ڈار نے کہا کہ شنگھائی تعاون تنظیم( ایس سی او) کے لیے پاکستان روس کا مشکور ہے۔
ان کا کہنا تھا کہ افغانستان کے معاملے میں بھی پاکستان اور روس کا تعاون جاری ہے، باہمی دلچسپی کے امور جس میں تجارت، معیشت پر بات چیت ہوئی اور توانائی کے شعبوں میں تعاون کو بھی آگے بڑھایا جائے گا، پاکستان اور روس کے درمیان تعلقات درست میں گامزن ہیں۔
نائب وزیر اعظم نے مزید کہا کہ پاکستان اورروس کےدرمیان اقتصادی تعاون کےبہت سےمواقع ہیں، دونوں ملکوں کےدرمیان تجارتی حجم ایک ارب ڈالرتک پہنچ گیا ہے، زراعت اورتوانائی کے شعبے میں بھی دونوں ملکوں کے درمیان تعاون کے بہت امکانات ہیں۔
روس کے نائب وزیراعظم الیکسی ورچوک نے کہا کہ تجارت، معیشت اور کلچرل کے شعبوں میں تعلقات مضبوط کریں گے، تفصیلی بات چیت ہوئی ہے کہ روس پاکستان کی معیشت میں کیسے مدد کر سکتا ہے۔
انہوں نے کہا کہ آج کی ملاقات میں بزنس اور عوامی رابطوں پر بھی بات چیت کی گئی ہے، روس کے وزیراعظم کی ایس سی او میں شرکت متوقع ہے۔
الیکسی اوورچک نے کہا کہ روس اورپاکستان کےدرمیان اعلیٰ سطح رابطوں سےتعلقات کومزید وسعت ملےگی، آئندہ ماہ روسی وزیراعظم کا دورہ پاکستان اہمیت کا حامل ہے۔
روسی نائب وزیراعظم کا مزید کہنا تھا کہ روس رواں برس برکس کی میزبانی کر رہا ہے، ہمیں خوشی ہے کہ پاکستان نے برکس کی رکنیت کے لیے اپلائی کیا ہے، ہمارے پاکستان سے اچھے تعلقات ہیں، ہم اس کی حمایت کرتے ہیں، اتفاق رائے سے پاکستان رکن بن سکتا ہے۔
آخر میں روسی ہم منصب کو جواب دیتے ہوئے نائب وزیراعظم اسحاق ڈار کا کہنا تھا کہ برکس کی رکنیت کے لیے ایک طریقہ کار ہے، طریقہ کار کے تحت ہی پاکستان برکس کی رکنیت کے لیے اپلائی کر رہا ہے، تمام رکن ممالک کی اتفاق رائے سے ہی حمایت ملتی ہے۔
