انٹرنیٹ کی سست روی اورسروسز خرابی کا مسئلہ حل ، سوشل میڈیا ایپس بحال
اسلام آباد : ملک بھر میں کئی ماہ سے جاری انٹرنیٹ کی سست روی کا مسئلہ حل ہونا شروع ہو گیا ہے۔ صارفین اب سوشل میڈیا ایپس اور دیگر آن لائن سروسز بغیر کسی رکاوٹ کے استعمال کر سکتے ہیں۔
گزشتہ کئی ہفتوں سے ملک بھر میں انٹرنیٹ صارفین کو سوشل میڈیا ایپس، خاص طور پر ٹوئٹر اور واٹس ایپ کے استعمال میں شدید مشکلات کا سامنا تھا۔ ڈیٹا ڈاؤن لوڈ ہونے میں انتہائی وقت لگتا تھا اور اکثر تو ڈیٹا ڈاؤن لوڈ ہی نہیں ہوتا تھا۔ اس سے آن لائن کاروبار کرنے والے افراد کو شدید مشکلات کا سامنا تھا اور ان کی آمدن متاثر ہو رہی تھی۔
انٹرنیٹ کی سست روی کی وجہ سے لاہور ہائیکورٹ میں بھی ایک درخواست دائر کی گئی تھی جس پر سماعت جاری ہے۔
انٹرنیٹ سروسز کے بحال ہونے کی وجوہات ابھی تک واضح نہیں ہو سکی ہیں۔ تاہم ماہرین کا کہنا ہے کہ یہ مسئلہ تکنیکی خرابی یا کسی اور داخلی مسئلے کی وجہ سے ہو سکتا ہے۔
انٹرنیٹ سروسز کے بحال ہونے پر صارفین نے سکھ کا سانس لیا ہے اور سوشل میڈیا پر اس کا اظہار کر رہے ہیں۔
حکومت نے اس مسئلے کے حل کے لیے کیا اقدامات کیے ہیں، اس بارے میں ابھی تک کوئی واضح معلومات سامنے نہیں آئی ہیں۔
