جعلی پاسپورٹس پر سینیگال جانے والے دو افراد گرفتار

جعلی پاسپورٹس پر سینیگال جانے والے دو افراد گرفتار

کراچی: جناح انٹرنیشنل ائیرپورٹ پر امیگریشن حکام نے جعلی سفری دستاویزات کے استعمال سے افریقی ملک سینیگال جانے کی کوشش کرنے والے دو افراد کو گرفتار کرلیا ہے۔

ایف آئی اے کے ترجمان کے مطابق، گرفتار افراد کی شناخت محمد عدیل اور مجاہد علی کے نام سے ہوئی ہے۔ ان کے پاسپورٹس پر یونان اور پاکستان آمد کی جعلی مہریں لگی ہوئی تھیں۔

امیگریشن عملے کو ان کے پاسپورٹس مشکوک لگے جس کے بعد انہیں مزید تفتیش کے لیے روکا گیا۔

ترجمان نے بتایا کہ ابتدائی تحقیقات سے پتہ چلا ہے کہ دونوں افراد وزٹ ویزے پر سینیگال جانے کی کوشش کر رہے تھے۔ انہیں مزید قانونی کارروائی کے لیے اینٹی ہیومن ٹریفکنگ سرکل کراچی منتقل کردیا گیا ہے۔

ایف آئی اے کے حکام کا کہنا ہے کہ وہ جعلی سفری دستاویزات کے استعمال سے انسانی سمگلنگ کی روک تھام کے لیے کوشاں ہیں۔ انہوں نے مسافروں سے اپیل کی ہے کہ وہ صرف اصل سفری دستاویزات کا استعمال کریں اور کسی بھی قسم کی غیر قانونی سرگرمی میں ملوث نہ ہوں۔