لاہور میں پولیس اور ڈاکوؤں کے مابین فائرنگ کا تبادلہ، اے ایس آئی شہید

لاہور میں پولیس اور ڈاکوؤں کے مابین فائرنگ کا تبادلہ، اے ایس آئی شہید

لاہور : شہر کے علاقے سندر میں پولیس اور ڈاکوؤں کے مابین فائرنگ کا تبادلہ ہوا جس کے نتیجے میں ایک اے ایس آئی شہید ہو گئے۔

پولیس ترجمان کے مطابق آرگنائزڈ کرائم یونٹ کی ایک ٹیم ڈاکوؤں کو گرفتار کرنے کے لیے چھاپہ مار رہی تھی کہ اچانک ڈاکوؤں نے فائرنگ شروع کر دی۔ جوابی کارروائی میں پولیس اہلکار اے ایس آئی نذیر شہید ہو گئے۔

واقعے کی اطلاع ملتے ہی ڈی آئی جی آپریشنز لاہور فیصل کامران موقع پر پہنچ گئے اور انہوں نے مفرور ملزمان کی گرفتاری کے لیے خصوصی ٹیمیں تشکیل دے دیں۔ پولیس نے علاقے میں ناکہ بندی کر رکھی ہے اور سی سی ٹی وی فوٹیج کی مدد سے ڈاکوؤں کی تلاش جاری ہے۔

ڈی آئی جی آپریشنز نے کہا کہ پولیس تمام وسائل بروئے کار لا کر مفرور ملزمان کو جلد از جلد گرفتار کر لے گی۔ انہوں نے شہید اے ایس آئی کو خراج تحسین پیش کرتے ہوئے کہا کہ ان کی قربانی رائیگاں نہیں جائے گی۔